羅馬止跌回升值追

猪拉多纳

01/10/2011


過去一星期，意甲重磅勁旅報復式反彈，「米蘭雙雄」一齊喺聯賽及歐聯開齋，首都大球會羅馬上輪意甲亦打開勝利之門，令新教練安歷基舒一口氣，球員信心亦返晒嚟。羅馬今晚主場對升班球隊阿特蘭大，可望乘勢再下一城。（now 633周日凌晨零時直播）




羅馬今季經歷更換班主、教練，人腳亦有唔少變動，需要時間適應，開季成績遜色，實在情有可原。經過一段時間磨合後，開始踢出隊形，上仗作客帕爾馬，羅馬眾將士都好搏命，憑鬥志贏波，大大振奮士氣。羅馬人腳不俗，依家打破樽頸位，表現應會愈來愈好，而且今仗要爭取今季首場主場勝利，戰意勢必更高。


阿特蘭大係時候獲利回吐


阿特蘭大因為假波案被扣六分，所以一開季就全力搶分，好快就由負六分，變為正四分，已達到初步目標，或者會回一回氣。事實上，阿特蘭大四戰有三勝一和，主因係對手實力欠佳，今仗遇上羅馬，恐怕係時候輸波。