利物浦 阿仙奴 打吡戰作客唔易啃

猪拉多纳

01/10/2011
文： 江忠德

連續兩晚打吡戰打甩髀！近排作客唔掂嘅利物浦同阿仙奴，假如再有乜嘢三長兩短，確係咪使旨意佢哋喺今季有大作為，尤其係愛華頓同熱刺喺主場出擊特別硬淨唔易啃！


愛華頓 熱刺主場硬淨


「紅軍」除咗趁「兵工廠」水深火熱偷雞攞咗3分之外，其餘兩場作客輸得都幾難睇，甚至上輪僅勝狼隊都欠缺說服力。其實「紅軍」唔使應付歐戰，專心踢本土波應可交足功課，奈何欠缺踢硬仗嘅氣質，畀對手硬食幾下就縮窒，而「拖肥糖」喺主場亦非善男信女，打吡戰腳腳七注，「紅軍」球員假如驚傷就死火！




至於阿仙奴3連勝睇落好似好巴閉，不過全部都係喺主場，佢哋要真正咁企番起身，就一定要喺失晒魂嘅客場威番次！「兵工廠」受傷兵所累被迫變陣，雖然喺歐聯攻得幾似樣，但對手只屬三流貨色，咁都要失波，後防甩漏隨時畀熱刺衝散！熱刺先苦後甜，一開咧輸畀「曼市雙霸」，但好在及後重拾信心漸入佳境，呢場波將成為有冇計仔爭入前4嘅關鍵！