熱刺恰番阿仙奴

猪拉多纳

02/10/2011
文： 樂比堅尼

今晚上演兩場倫敦打吡，最矚目當然係北倫敦打吡熱刺主場對阿仙奴。以往熱刺長期畀阿仙奴食住，但近期風水輪流轉，今仗更掉轉頭熱刺讓平半，但樂比仔認為近況大勇嘅熱刺絕對讓得起，捧上盤及大盤。（有線200及300台周日晚11時直播）




熱刺可謂今季轉會市場大贏家，免費借用到好使好用嘅艾迪巴約，廉價收購上季足球先生柏加，又成功留住莫迪歷、雲達華治等主將，如果單從人腳計，起碼高阿仙奴一個檔次。柏加同艾迪巴約嘅加盟，對熱刺絕對起到立竿見影作用，淨係睇熱刺季初頭兩場聯賽輸波，得到兩人加盟後立即三連勝，艾迪巴約更射入三粒，就知佢哋重要性。


熱刺人腳秤先 兵工廠防線曳


事實上，熱刺目前板櫈深度高，前線侵略性極強，好似艾朗連儂、加里夫巴利、迪科爾、雲達華治等，全部都係有速度有技術，具備入球能力球員，以往熱刺最怕嘅球員係艾迪巴約，因為佢代表阿仙奴對熱刺九次入八球，如今艾迪巴約都係自己友，熱刺仲怕乜？記得艾迪巴約兩年前代表曼城倒戈對阿仙奴時，踢到曉飛入波兼贏四比二，今場睇落都係類似格局！




阿仙奴今季問題多多，雖然上仗聯賽以三比○擊敗保頓，但如果唔係對手下半場初段踢少一人，阿仙奴都唔知可唔可以贏得咁輕鬆。阿仙奴最嚴重係後防線，上次作客布力般都可以失四球，真係唔知對熱刺會輸幾多球，有報道指桑治今場可能會推落一格踢中堅，但樂比仔相信唔幫得幾多，更隨時影響埋中場截擊力，今場捧熱刺上盤之餘，一於捧埋大盤啦！


大仇必報


樂比仔今場揀大都算有眼光，事關近十場「北倫敦打吡」有七場九十分鐘內開大，而且熱刺近年碰親阿仙奴都娛樂性十足，○八年開始有四場總入球達到五球或以上，最令人印象深刻莫過於○八年十月，熱刺在作客環境下，完場前連入兩球，以四比四逼和阿仙奴。


北倫敦打吡數據


熱刺勝 52次

和 47次

阿仙奴勝 71次

近10次北倫敦打吡

日期 賽事 賽果（前者主場）

21/04/11 英超 熱刺3:3

20/11/10 英超 阿仙奴2:3

22/09/10 英聯盃 熱刺1:1

15/04/10 英超 熱刺2:1

31/10/09 英超 阿仙奴3:0

08/02/09 英超 熱刺0:0

29/10/08 英超 阿仙奴4:4

22/01/08 英聯盃 熱刺5:1

09/01/08 英聯盃 阿仙奴1:1

22/12/07 英超 阿仙奴2:1