女子歐聯同樣打甩髀

猪拉多纳

02/10/2011
文： 法比加輝

歐聯電視轉播收益豐厚，搞到歐洲大會可以唔捧盃，但就唔能夠冇歐聯踢！想唔到呢股風氣已吹到女子足球，近年女子歐聯愈來愈受歡迎，電視台陸續增加直播場次，球會收益自然大增，因此一眾強隊就如男足般紛紛招兵買馬，務求一路晉級搵真銀。




上周中剛踢完今屆女子歐聯三十二強首回合，最令人失望首推奪標熱門法蘭克福，竟爆冷不敵史達比克女足，幸好次回合會返主場作賽，加輝深信佢哋能夠輕鬆翻盤。法蘭克福對上一次登歐洲之巔已經要數到○八年，為求重溫美夢，早前除打破德國轉會費紀錄簽入芭拉瑪之外，亦羅致了日本世盃功臣熊谷紗希去扼守防線，實力進一步提升。




能夠拍得住法蘭克福，加輝認為只有同屬德國嘅圖爾賓女足。圖爾賓今季收購赤道畿內亞隊長艾安曼，結果首回合亦大勝對手六球。至於上季冠軍里昂女足，個人就唔太睇好，阿仙奴女足、邦比女足等歐聯常客亦唔入流。


皇馬半場和「愛」得過


俄羅斯球會羅希燕卡女足亦要留意，呢班波堪稱「女足版安治」，有機會再同讀者介紹一下。西甲愛斯賓奴主場對皇家馬德里，皇馬作客唔識入波，加輝捧半場和。




（now 632周一凌晨4時直播）