馬體會西維爾開「攻」大吉

猪拉多纳

02/10/2011
文： Sherry

弊啦弊啦，西甲今晚又有場大戰，由馬體會主場迎戰西維爾，成12點先開波，小妹又要捱夜睇波喇！不過冇緊要嘅，今場波一副鬥攻格局，肯定勁多入波睇，多對熊貓眼又有乜所謂喎，最多敷番幾次Mask囉！（now632及660台、中央５台周一凌晨0:00直播）




小妹喺過去一星期除咗努力搵工，仲抽時間翻睇韓劇《秘密花園》，呢套劇係講男女主角喺一次意外中互換靈魂，用對方身體去體驗另一個人嘅生活，從而互相欣賞，現實同幻想世界交錯，劇情唔單止創新，仲勁感人，小妹即使睇過，但都忍唔住喪喊！仲有呀，男主角玄彬真係堅靚仔，睇嚟過多一排，我就會睇第3次，呵呵！


法卡奧西甲有5個士哥


除咗睇韓劇，周中歐洲賽我都有捱眼瞓捧場㗎！小妹近排鍾意咗馬體會，呢班波技術真係一流，最緊要係有前冇後一味攻，堅好睇！尤其係射手法卡奧，跑嗰陣啲頭髮揚吓揚吓咁，勁Charm囉！就算唔計個靚樣，呢位上屆歐霸盃神射手至今已取得5個聯賽入波，以一位西甲新丁嚟計，表現已經幾好，何況中場校炮手迪亞高今戰仲波監期滿復出添，法卡奧同阿祖安盧比斯就唔愁冇輸送啦！


簡路迪回勇3戰入2粒


對家西維爾都有一對超勁前鋒壓陣，佢哋就係尼格度同簡路迪喇！馬里殺手簡路迪獲教練解凍後，近3仗入咗2粒，狀態似乎好番好多；佢嘅拍檔、西班牙國腳尼格度就仲堅，無論國際賽同聯賽都有波入，呢個光頭仔係就係其貌不揚，不過佢嘅無私助攻、對比賽嗰種激情，都一樣吸引到小妹目光，既然兩軍都有咁多勁前鋒撐場，與其估邊隊贏，倒不如捧1.7倍入球大仲好啦！


Sherry靚盤：馬德里體育會（入球大）




微博傳情 \(^O^)/


上星期真係堅開心！除咗Final Exam 個Result係All Past之外，小妹經過不斷Send CV之後，終於有見工嘅機會！哈，一分耕耘一分收穫呢句說話，原來係真嘅！與各位讀者朋友共勉之！

雖然小妹不嬲都鍾意波衫Look，舒服嘛，不過呢份係銀行工，當然要化番個靚妝，着套OL裝去Interview啦。