皇馬強鋒摧毀愛斯賓奴

猪拉多纳

02/10/2011
文： 鄭少偉

晨曦每年都會同中大合作做體能測試，幫教練Rambo了解球員狀態。查實依家大部分測試都利用好多高科技儀器，早排我睇咗段關於Ｃ朗嘅片，睇完後更了解佢嘅恐怖！今晚皇馬作客愛斯賓奴，捧1.55倍「讓球客勝」！（now632、660台及廣東體育周一凌晨4:00直播）




C朗一向畀人獨食嘅感覺，但睇完呢段片，可能會令大家對佢改觀！呢段片分4 Part去解構佢嘅身體結構，印象最深嗰Part係測試佢嘅把握力，側邊有工作人員模擬出波，一斬球波後就即刻熄燈，等C朗預測個波嘅落點，結果係佢3球全中！


出動施丹力斟夏薩特


「亨利」真係服咗佢，其實近幾年C朗比賽嘅心態比以前正面好多，應射就射、應畀就畀，最重要係佢無論贏緊幾多球都吓吓搏盡！仲有喎，今季全面回勇嘅卡卡周中歐聯又有士哥，據聞皇馬仲想簽埋里爾個中場王牌夏薩特，《阿斯報》尋日爆料，皇馬出動施丹做說客，利用佢喺法國嘅影響力，喺出年1月用3,000萬歐元收購呢位比利時巨星，競爭咁大，班球星更加要爭氣，皇馬即使作客一樣有力大勝！


愛斯賓奴彭迪安尼停賽


主隊愛斯賓奴上季靠攻擊鐵三角打響名堂，不過奧斯華度、荷西卡利祖同路爾斯加西亞都轉晒會，大大削弱「賓佬」嘅入球能力，咪忘記彭迪安尼上仗領紅，今場又唔使預佢，咁嘅款頭點同皇馬鍊呀？輸少當贏啦！