利亞拿新帥好心冇好「布」

猪拉多纳

02/10/2011
文： BlackJack

現代科技係人類嘅好幫手，問題係未必一定即刻見效，好似葡超排尾二嘅利亞拿，換咗教練兼出動埋戰術軟件，都未必可以立即反彈。今日佢哋主場迎戰布拉加，應該又係死路一條，布拉加個熱W用嚟過仙台大、FC橫濱下盤就最啱。


串埋橫濱下盤櫻花大


利亞拿開季6戰僅一勝，於是換咗光頭佬卡祖達（小圖）執教，佢幾十歲人都識用iPad救隊波，仲自己使咗6,000歐元，即係成7萬港紙添置咗套戰術軟件，用嚟分析隊波練習同比賽嘅數據，希望提升利亞拿嘅表現。不過，食藥都要畀啲時間至見效吖，利亞拿想馬上翻身唔係咁易，何況布列古度、馬高史密夫、伊利曹特仲有傷，對住葡超「三哥」布拉加好難唔輸。




場日乙FC橫濱對札幌岡薩多，就不妨扒吓冷要受讓平半嘅橫濱，雖然佢哋有高地系治、中野洋司坐波監，但係呢隊波高層尋日出現變動，北川浩史代替小野寺裕司出任社長，明顯話畀下面班人知，成績唔好邊個都瓜得，可能刺激到士氣。




無疑今仗响東京個國立競技場踢，令人記起呢季佢哋响度大敗過兩次，先後以0:3、2:7衰畀FC東京同綠茵，但札幌亦唔好得幾多，以往10月出戰橫濱2次都未贏過，老將中山雅史又膝傷打柴，會方仲承認將丹尼臣哥度巴賣咗畀名古屋鯨魚後，先勉強冚得住赤字，但下個月仲要通過J聯賽理事會財政審查，先知有冇資格打日職，否則攞到升班席位都冇用，真係內外交困。




至於日職仙台維加泰對大阪櫻花，簡單啲博入球大，因為櫻花有攻冇守，佢開唔到人大，都會畀人開，何況仙台今場波搞紅十字會捐血活動，兩隊可能一齊大出血。