南美九龍爭珠

猪拉多纳

05/10/2011


2014年世界盃外圍賽南美洲區大戰周六凌晨打到嚟！傳統「一哥」巴西以主辦國身份直接進身決賽周，令今屆外圍賽失去「森巴足球」身影，到底呢個賽區仲有乜嘢睇頭呢？咁又唔使愁，南美人傑地靈，九路雄師各自各精彩，爭一哥、博上位、鬥香艷、創歷史，一齊做齣好戲畀大家睇！


烏拉圭氣勢勝過阿根廷


南美球壇改朝換代，阿根廷管理曳又唔團結，美斯出場得番三成功力，今次外圍賽於巴西缺席下，都未必做到一哥。烏拉圭三箭頭卡雲尼、蘇亞雷斯同科蘭充滿威力，勇奪美洲國家盃後氣勢如虹，個勢勒都勒唔住，有力再稱霸南美洲。


球星團結充滿榮辱感


阿根廷球員天才橫溢，一條鋒線尤其豪華，但無論邊個帶隊，都未能管得掂班「球霸」，一班球星明爭暗鬥，連美斯都被排擠，真係無藥可救。新帥沙貝拉名氣唔夠，只能排出金玉其外陣容應戰，呢班波好睇唔好食，或會繼美洲國家盃，再令擁躉失望而回。




烏拉圭足球衰咗咁耐，呢兩年終於強勢抬頭，先取世界盃季軍再捧美洲國家盃，呢班波團結得嚟仍然餓波，卡雲尼同蘇亞雷斯雖已打響名堂，但為國上陣依然充滿榮辱感，要壓倒阿根廷成外圍賽一哥，絕對唔會令人意外。


巴拉圭射手雲集


另外，巴拉圭有別南美進攻足球風格，以防守打出另一片天地，今年美洲國家盃由分組賽至四強，單計九十分鐘都和波，神奇殺入決賽，將防守足球發揮得淋漓盡致，任何對手都難以擊敗佢哋，而且唔好忘記巴拉圭仲有奧斯卡卡度素、巴里奧斯及希度華迪斯等出色前鋒。




防守固若金湯令巴拉圭保持穩定水準，上屆世界盃外圍賽，已力壓阿根廷，取得第三位，而且只係比當時第一位嘅巴西少一分，足以證明巴拉圭有力挑戰南美一哥寶座。

占士洛迪古斯哥國希望

阿根廷、烏拉圭人腳鼎盛，兩軍陣容球迷都耳熟能詳，新星要上位唔易，反而哥倫比亞、秘魯同智利都有唔少潛質新秀，佢哋已磨拳擦掌，靜待機會大爆發。

秘魯雷迪亞斯彈起

哥倫比亞除法卡奧同古度連外，新星占士洛迪古斯亦極具級數，呢位廿歲翼鋒腳法上乘，把握力極佳，本季已轟入四個葡超入球。波圖睇中嘅南美新星質素有目共睹，依家佢解約費已高達4,500萬歐元，嚟緊於國家隊大把世界。

應屆美洲國家盃季軍秘魯，廿一歲前鋒雷迪亞斯，應該幫到荷西古里路手。呢名秘魯體育大學鋒將，於國內有「小美斯」之稱，就知佢踢法刁鑽腳法一流，登陸歐洲只係遲早問題。同時，智利亦有熱拿亞中場施莫亞在陣，佢被意大利傳媒封為新大衞比沙路，或能於今次外圍賽打出名堂。

委內瑞拉盼零的突破

巴西自動取得決賽周席位，但南美洲區仍有4.5個世界盃位置，換言之出線機會高達一半，洲內唯一未踢過世界盃決賽周嘅成員國委內瑞拉，正好趁機創造歷史，擺脫「孤兒仔」身份。

委內瑞拉喺一九六六年世盃，開始參與外圍賽，但從未試過出線，一度係南美洲區最大魚腩。不過呢個盛產環球小姐嘅國家，近年足球水準已經大大提升，前屆外圍賽排第七，上屆只係少第五位烏拉圭兩分而未能參與附加賽。

國腳闖歐搵食升呢

委內瑞拉已有唔少球員去歐洲搵食，包括馬拉加前鋒荷西朗頓、慕遜加柏中場艾蘭高及烏甸尼斯門將洛慕等人，人腳質素唔差。以委內瑞拉進步速度，今次要打入前五位，的確有可能。