英軍細征黑山

猪拉多纳

07/10/2011
文： 麥馬拿仁

歐國盃G組外圍賽，英格蘭作客黑山。「三獅兵團」射手朗尼近期狀態回落，曼城眾將亦一樣，最重要係英軍今場攞多一分，就肯定取得首名出線資格，唔輸就得咁搏把鬼？黑山今場不敗，最後一仗決戰瑞士爭次名有主導權，死守下入波唔多，捧細！（now 632及660周六凌晨3時直播）




英格蘭上輪兩場國際賽，作客大數保加利亞三蛋，次仗主場係咁易贏威爾斯一球，目前領先黑山六分多打一場，今戰只要打和就已達標。球隊狀態有起有跌，英軍球星多數要兼顧英超同歐聯，所以佢哋好識揀波踢，自己實力高過對手，又只須多取一分就搞掂，落到場肯定會穩陣行先。


「細盤王」黑山和波冇壞


另一方面，曼聯同曼城自歐聯開咧後，幾名主力都冇季初咁弗，大佬踢咁密鐵人都死啦，當中朗尼近三仗都冇波入，佢今場大爆發機會唔高。預計英格蘭今仗除非落後，唔係都唔會谷盡嚟踢，入波唔會多，分分鐘繼去年十月兩軍於溫布萊交手悶和後，再整多場○比○。




黑山本身開局一直同英軍叮噹馬頭，但近兩仗先和保加利亞，再輸畀威爾斯，明顯後勁不繼，今次鬥英軍雖有主場之利，但佢哋都會有自知之明，以一分為目標。事實上，現時黑山領先第三位瑞士三分，今場只要有一分落袋，就算瑞士可以擊敗威爾斯，最後一輪作客瑞士，黑山只要唔輸就得保次席，故今仗肯定會死守英軍。




黑山一直都係「細盤天尊」，分組賽六場有五場開細，入五球失三球，如果球隊一心打守勢波，hea踢嘅英軍要入波唔易。