歐國盃外圍賽4大1哥生死戰

猪拉多纳

07/10/2011
文： 力奇

歐國盃外圍賽嚟到最後兩輪，9組之中，勁旅如德國、意大利、荷蘭同西班牙已率先攞咗決賽周入場券，英格蘭亦9成晉級，但其餘B、D、F、H組嘅「一哥」就依然騰騰震，要為出線席位作最後打拚。想睇C朗、拿斯尼、莫迪歷同艾沙維4大巨星喺出年暑假獻技？記得今晚為佢哋打氣呀！

葡萄牙強鋒摧毀冰島

H組嘅葡萄牙係形勢最險峻嘅「一哥」，佢哋家陣同丹麥及挪威同得13分，最後2仗非勝不可，強盛鬥志就連隊長C朗都決定帶傷上陣，對住冰島有殺冇賠，「-2」照捧1.75倍嘅「讓球主勝」！（有線61、64、201及204、中央5台周六凌晨4:00直播）


葡、丹、挪3隊同分，其中挪威打多1場似乎最蝕底，但葡、丹兩軍要喺最後一輪硬撼，形勢其實都幾微妙，為免夜長夢多，葡萄牙今晚梗係想炒得就炒，鬥志絕無疑問。人腳方面，進攻中場丹尼因傷退隊，補選入嚟嘅波圖戰將施維斯達華利拿上陣機會唔大。C朗臀部有傷，已經缺席周三操練，但隊醫話有信心C朗可以紮住上，以佢超強體格，應該唔多使擔心。

冰島首循環主場輸1:3

當然，比比同法比奧干查奧因傷落選，卡維奴搞事又被踢出隊，球隊防線就要靠路蘭度同般奴艾維斯去支撐，係，講級數佢哋未算歐洲最頂級，但講到底，對住冰島就一定夠殺有凸，何況領隊保羅賓圖明知防線有隱憂，梗係會以攻代守，前場有C朗加拿尼同普斯迪加嘅組合，要入番兩、三球有幾難？


客軍冰島首循環主場對葡萄牙都輸1:3，實力唔夠砌，領隊奧拉科祖漢尼臣教埋今仗就正式約滿離隊，無心戀戰仲點可以有寄望？睇埋佢哋人腳，踢昆士柏流浪嘅前鋒希古臣因傷缺陣，想偷雞入波就要靠接近收山嘅老將古莊臣，咪玩啦！