日本「-2」照炒越南

猪拉多纳

07/10/2011
文： 吉拿甸奴

2014年世盃亞洲區外圍賽過幾日重新開打，日本今晚喺熱身賽主場對越南，讓球主客和「-2」照捧「主勝」。上個月日本足協舉行創會90周年宴會，教頭沙哲朗尼話，希望教多10年迎接百周年會慶，加上王牌香川真司喺家鄉神戶出戰，利物浦又專登派專人睇佢，點可以失威先？


（開賽時間：周五晚6:45）


沙哲朗尼被東瀛傳媒形容為「無敗攴指揮官」，上任後未輸過，期間又領軍重奪亞洲盃冠軍，而且執教風格係日本球迷最鍾意嘅「進攻重視」，當然得人心。今場沙哲朗尼又話要用佢最心愛嘅343試陣，隊長長谷部誠話會同隊友多啲溝通，希望沙哲朗尼改革成功，證明佢勁多人撐，教多10年唔奇喎！

傳紅軍2.16億斟香川

雖然日本今次有前鋒本田圭佑、中場清武弘嗣同右閘內田篤人因傷冇入選，但左閘長友佑都得到重召，加上其餘外流球員包括前鋒岡崎慎司、中堅吉田麻也同門將川島永嗣全部歸隊，牌面依然強勁，最緊要係，香川真司難得喺神戶鄉里面前比賽，佢家人同朋友已打晒鑼話要拉隊捧場，唔發威勢係假。


仲有呀，據聞利物浦派咗專人現場睇香川真司嘅表現，而且準備開價1,800萬鎊（約2.16億港元），喺出年1月將佢帶到晏菲路，有得去英超，踢落梗係更加肉緊啦！至於對家越南，就喺世盃亞洲區第2圈外圍賽被卡塔爾踢出局，而且最大牌嘅射手黎公榮連葡甲歷索斯都踢唔掂，咁嘅質素，想爆冷唔容易。