洪禮賢講馬：鷹之團 賽績硬淨

猪拉多纳

　　第十場二班1200米。「鷹之團」跨季7場未斷纜，場場有三甲，今仗終於轉路程，初次跑轉彎1200米，適唔適應到？唔多清楚。事實上，剛仗贏馬雖然輕鬆，但尾段發力之際，已經見佢馬身擺嚟擺去，踩油嗰段，「片」得更明顯，所以，轉彎路程未必完全冇難度。好就好在排內檔，較為容易借借外側對手頂住及輔助，同埋，轉番柏寶更熟馬性，整體發揮會做得仲好。總之，未甩過P嘅馬，陣上唔係犯大錯，至少有三甲。

　　第十一場三班1400米。「紅山茶」去季一出即勝，好似裝咗turbo咁，不過，好明顯係打緊天才波，因出腳唔順（尤其一對前腳）、時有斜跑、過程中又唔係好聽騎師指令。到咗今季首戰，又喺拉士爆段勁，但只得第三名，輸喺邊？主因有三，其一，步速太慢，撞啱1場五班不如嘅頭三段（慢至1分鐘過外）；其二，比賽時仍然唔規矩，直路亦塞過；其三，閘前擾攘一輪，或影響心情。如果照咁計，初上三班仲有P，已經好叻！今場雖然又遇上「香檳歲月」，好在同場至少有三兩駒早段會放，唔應該又出現上場不利環境。只要本身稍比上賽乖，多點投入感，以佢嘅級數，可食尾胡。

馬會賽馬節目主持　洪禮賢