蘇格蘭狂轟列支敦士登

猪拉多纳

08/10/2011
文： 朱楓

今晚歐國外I組蘇格蘭作客魚腩列支敦士登，睇落冇得輸，但領隊利雲以防萬一，賽前都狂煲對手DVD，仲講明會打進攻足球，適逢對手鬧前鋒荒，朱楓覺得蘇格蘭有權贏夠2粒，開出1.84倍「讓客」！（now632台周日凌晨1:30直播）




先講I組目前形勢，西班牙已肯定首名出線，次名由捷克同蘇格蘭爭奪，雖然截稿前未知捷克對西班牙邊隊贏，但蘇格蘭為上次席，今晚點都要贏波。


堅尼米拿紮住上贏戰意


為備戰呢場賽事，蘇格蘭領隊利雲首度徵召中場丹尼史雲遜，並重召米堡中堅麥馬奴斯。雖然中場史葛布朗、辛迪加斯同門將基克斯先後因傷退隊，隊長費查又扁桃腺發炎冇隨隊出征，遲歸隊最後唔知會否上陣，但據講鼠蹊受傷嘅射手堅尼米拿決定唔理醫生勸告堅持上陣，戰意冇得頂。事實上，蘇格蘭領隊利雲都知呢場好緊要，賽前大爆自己睇咗6隻列支敦士登比賽嘅DVD，前前後後足足睇咗18次，話已經睇通晒對手所有嘢，揚言今場會大打進攻足球。


主隊鬧前鋒荒領隊投降


列支敦士登雖已無緣出線，不過今屆表現唔曳，首循環作客蘇格蘭一度領先，去到補時先輸波；主場更試過贏立陶宛2:0，可惜今晚有上次作客蘇格蘭先入波、國家隊史上首席射手費克受傷上陣五五波；贏立陶宛時先開紀錄嘅菲臘比安利又因傷落選，加埋中場保治美亞停賽，難怪領隊蘇治賽前都承認隊波甩皮甩骨，今場根本冇可能搶到分，連領隊都睇死自己，你話仲邊有可能創造到奇迹？


賽制：


51支隊伍將分成9組出賽，每組各隊採主客制，勝3分，和1分，負0分。每組首名及9組中最佳成績的次名球隊直接出線，其餘8組次名球隊需進行兩回合附加賽決定另外4個出線席位。