珀斯光輝頭炮打德響

猪拉多纳

09/10/2011
文： 樂比堅尼

今日兩場澳職，樂比仔較睇好珀斯光輝，呢支上季常規賽排尾二嘅西澳球隊，今季痛定思痛羅致多名好手加盟，實力大幅提升，加上珀斯一向係「地頭蟲」，作客嘅阿德萊德聯要遠征二千多公里去到珀斯比賽，平手盤樂比仔揀珀斯光輝。（周日下午4時30分開賽）




珀斯光輝近年野心勃勃，上季搵來科拿加盟，可惜效果平平無奇，入唔到季後賽不特止，仲要排尾二，今季佢哋增兵唔再以名氣為依歸，最緊要實用，所以羅致咗前黃金海岸聯同威靈頓鳳凰射手史美斯加盟，呢位新西蘭國腳係兩季澳職神射手，入球量相當穩定，珀斯光輝得到佢加盟之後攻力大增。


阿德萊德聯人腳大變


除咗史美斯之外，另一位值得留意球員係查維斯杜特，佢今仗將會倒戈鬥阿德萊德聯，查維斯杜特係當年阿德萊德聯打入亞冠決賽嘅重要功臣，感染力十足，而且擅長喺中場校炮，中場線有佢同前曼聯中場米拿合作，可謂睇頭十足。阿德萊德聯今季人腳變動頗大，效果係點唔知，作客不宜過分睇好。




另一場黃金海岸聯主場對威靈頓鳳凰，黃金海岸聯今季大搞青春班，多名主力走人，不過威靈頓鳳凰作客亦唔叻，季初又因財困而影響軍心，今場建議捧和波及細盤。




（周日下午2時開賽）