冷敲法林明高和致「富」

猪拉多纳

09/10/2011
文： 郭球奇

今晚巴甲爆發里約熱內盧超級打吡，由法林明高主場大戰富明尼斯。兩隊近況都弗到漏，可惜今場都唔齊章；考慮雙方目前都仲有機會爭標，肯定各不相讓，再睇埋兩隊近年交手好多時都分唔到勝負，球奇決定冷敲瓣3.2倍和局！（開賽時間：周一凌晨3:00）


法林明高Vs富明尼斯


法林明高同富明尼斯出晒名係死敵，打吡戰更產生「Fla-Flu」呢個專有名詞。兩隊今季表現都幾對辦，暫列第5、6位仍有爭標機會，難怪今場波喺當地極受關注。


細哨缺陣火力都咁堅


當中法林明高近況回勇連贏2場，可惜今晚有靈魂朗拿甸奴為巴西國家隊披甲缺陣，防中韋利安斯杜明高斯、艾爾頓同中堅古斯達禾全部停賽，不過教練盧森保高賽前就話未驚過，因為仲有佢同阿根廷中場保天尼利壓陣，而且又諗定搵前鋒迪亞高梅里斯奧頂細哨個影子前鋒位，呢位20歲新星亦爆料話朗拿甸奴臨走前向佢教路，仲話已經諗好入波後跳舞慶祝，信心爆晒棚。加上早幾日仲發燒肚瀉兼脫水嘅正選門將雷斯菲臘比，病愈無礙可以復出把關，法林明高實力仍然唔講得笑。


富明尼斯往績蝕底


相對法林明高，富明尼斯近況仲癲，對上8場贏足6場，難怪被當地傳媒睇好可以打入前4進身下屆自由盃，不過右閘馬連奴費拉拿賽前就揚言目標係要取得今季巴甲冠軍。其實富明尼斯有中場迪高復任正選，兼有阿根廷超新星蘭仙尼復出，可惜隊長兼射手費特今場為巴西征戰缺陣，後衞迪加奧又要停賽，贏波本錢即時大減，再睇埋佢哋近6次作客法林明高竟然不勝，反而有4次同對方打成平手，始終都係博瓣和波會比較正路！


法林明高近6次主場對富明尼斯戰績


日期 戰果




10/09/20 法林明高 3:3 富明尼斯

09/10/04 法林明高 2:0 富明尼斯

09/08/26 法林明高 1:1 富明尼斯

日期 戰果

09/04/12 法林明高 1:0 富明尼斯

09/04/05 法林明高 1:1 富明尼斯

08/08/31 法林明高 2:2 富明尼斯