洪禮賢講馬：沙紙１定補中

猪拉多纳

　　第六場三班1650米。「魅力星」初出在發揮及際遇上唔多好，先係出閘慢咗，繼而途中勒避過並曾失步韻，跑至直路中段，唔單只跑線畀對手攞埋，仲要一度被壓住，如果冇咁多曲折，相信會有P。

　　睇佢復課工夫，練者肯繼續磨，隻馬體重就冇跌，兩樣都係好事；唯一考慮今場步速未必快，事關同場數嚟數去，可能只得「心中有程」會喺早段立心置前，對佢後追跑法極不利，寄望1檔或驅使此駒跑法略作調整（上季第2W時，前中段跟喺五六位），肯轉膊則未必唔可以克服。

　　第七場三班1200米。「沙紙」初出入Q幾叻，表面上，末段畀「威威多星」技術性擊到，約跑至最後200米，兩駒一拍埋鬥，冇耐佢已經畀頭馬拋甩咗，但有兩點要留意，其一，佢喺早段蝕多咗同用多咗力，先能夠由三叠移入；其二，佢自己亦可彈開季軍「滙名燈」個幾身位（後駒再出即勝），如果撈埋嚟計，唔覺第二名水準唔好。今仗由9檔變1檔，賽事局面將完全係另一回事，而預期早段走先嘅馬唔少，或令佢置身理想包廂位置，正正似上季贏馬時一樣，若果形勢與假設相近，沿途賺到盡，點會冇贏面。