排433擺大頭 阿根廷強爆委內瑞拉

猪拉多纳

11/10/2011
文： 九叔

有馬斯真蘭奴、迪米捷利斯、安度查復出嘅阿根廷，今日响世界盃南美洲區外圍賽作客委內瑞拉，決定排出「4-3-3」攻擊陣式，擺明就係求兩連勝，1.5倍客W熱都要捧。（開賽時間：周三早上8:50）


委內瑞拉球迷係美斯Fans


阿根廷上場波4:1炒起智利，响外圍賽旗開得勝，成班人心都雄埋，教練沙貝拉決定排「4-3-3」乘勝追擊，因為龍門安度查、迪米捷利斯都好番，馬斯真蘭奴波監刑滿，防線穩健程度大增，大把本錢踢進攻足球。而且9月初响加爾各答友賽小勝委內瑞拉1:0嗰次，阿根廷係玩「4-4-2」嘅，今鋪變陣仲會令對手無所適從添。




雖然委內瑞拉話唔驚阿根廷，聲稱維斯卡朗度、施希路同施薩干沙利斯都踢過阿甲，熟晒對手嘅波路，但係佢哋近8年嚟6戰阿根廷都輸晒，又點信得過吖！今場波委內瑞拉降低咗票價，坐爆就肯定o架嘞，但係《奧萊報》報道，唔少委內瑞拉球迷原來係美斯Fans，呢次睇波除咗支持國家隊，仲捧埋美斯場，咁算唔算有主場之利呢？




事實上，打破咗國際賽入球荒嘅美斯愈嚟愈順，今勻又有巴塞物理治療師「義助」隨軍照顧，迪馬利亞、希古恩又好弗，委內瑞拉對住阿根廷唔輸爆廠嘅話，真係還得神落。