不來梅多蒙特食「大」茶飯

猪拉多纳

14/10/2011
文： 走肖

足球世界，邊個嫌錢腥？雲達不來梅今晚喺德甲主場對多蒙特，「大」茶飯預埋你！不來梅今季強勢復甦，關鍵可能係佢哋有10個球員等住續約，射手比沙路更加要為掛靴前最後一份肥約而戰，撞啱多蒙特新星馬里奧葛斯要顯身價博轉會，鬥攻買1.68倍入球大最啱數。（有線61及201周六凌晨2:30直播）




上季不來梅淪落到護級，今季冇得踢歐洲賽，固然係佢哋反彈嘅原因，但唔好忽略，目前不來梅有10個球員等續約，當中包括射手比沙路同隊長富斯，據不來梅高層所講，佢哋要拎到下屆歐聯入場券，先至有足夠資金同陣中高薪球星續約，咁大家明白，33歲嘅比沙路點解近4場喪入5球啦？


富斯等10人為前途而戰


除咗比沙路，30歲嘅富斯都一樣，隨時爭取緊自己職業生涯最後一份肥約，試問佢哋有咩可能唔緊張？再講，雖然不來梅今場有前鋒阿拿奧杜域停賽，但頂佢個位嘅29歲前鋒羅辛貝治，又係要為續約搏命，加上首席門將韋爾斯要繼續坐波監，遇着連續4場開入球大嘅多蒙特，唔開入球騷真係對唔住球迷。


香川真司成大會獵物


對家方面，多蒙特新星馬里奧葛斯得到德國教頭勒夫提早放人，準備呢場「大」戰，而且最近有消息話，現時多蒙特將佢標價5,000萬歐元，皇馬同曼聯價高者得，即係話佢要轉會，嚟緊要踢得更屈機，加上佢隊友香川真司同樣大把球會睇中，又剛啱喺世盃外發威梅開二度，拍住馬里奧葛斯唔憂冇波入。


不來梅場場有波入


‧連續6場聯賽有波入，攻入14球。




‧聯賽8戰得1次半場落後，其餘2次領先、5次打和。

蜜蜂兵團作客慢熱

‧對上5次對賽有3勝1和1負。

‧近5場作客未試過半場領先，2次打和、3次落後。