曼城金身硬過維拉

猪拉多纳

15/10/2011
文： 車車

今季英超仍然保持到不敗之身嘅除咗曼聯同曼城外，仲有阿士東維拉同紐卡素。今晚曼城主場對阿士東維拉，捧「讓球主勝」及入球大。（有線300及200台周六晚10時直播）




曼城一直死咬住曼聯唔放，依家大家都係六勝一和，得失球只差一球，球隊雖有泰維斯作怪，好在高層夠狠，罰佢停賽兼罰錢，班球員唔敢放肆之餘，更加乘機攝位博表現。


棄泰維斯更振軍心


其中阿古路已經話明唔會學泰維斯，就算文仙尼要佢做後備都唔會怨。另外，巴洛迪利又突然生性，已經連續兩場英超有士哥；連新來報到嘅拿斯尼表現都交足貨。位位目標一致，巴利仲信心十足咁話曼城距離冠軍位置唔遠得去邊！




近年曼城的而且確進步唔少，前季攞第五，上季就第三，仲贏埋足總盃，今季目標直指冠軍，今晚實行先搵維拉祭旗，大炒一場打好個底，下輪作客奧脫福硬撼紅魔鬼。




事實上，維拉同曼城屬兩個級數，雖然維拉今季七場聯賽都係未輸過，但只係贏過兩場，嗰兩場除係主場外，對手只係韋根同布力般流浪！曼城個個都係上品貨，相比之下，只得嗰一、兩個高質球員嘅維拉又點夠鬥呢！




「車車」在1998世界盃至今已成「資深球迷」，2001年起在電台主持年輕人節目，2005年起主持電台足球節目，2010年底加入球彩台，主持《球彩俱樂部》及《球盤龍門陣》，並參與每周足球賽事直播。

曼城 Vs 阿士東維拉

讓球主勝 / 入球大