追史浩克新帥效應

猪拉多纳

15/10/2011
文： 蘇斯黑柴

德甲尾場直播史浩克04主場鬥凱沙羅頓，史浩克換帥後表現同成績更進一步，證明由史堤芬斯取代因病辭職嘅蘭歷克係明智之舉，今晚主場蓄銳迎戰降班膽，贏面高唱入雲，黑柴捧2.05倍「讓球主勝」。（有線61及201台周日凌晨零時30分直播）




史浩克擁有魯爾、亨特拉爾同法芬三位世界級攻擊手，過去演出欠穩主因係攻強守弱，前主帥蘭歷克嘅踢法似乎太過激情，穩陣先生史堤芬斯回巢，令球隊攻守更加平均。史浩克今季聯賽連歐霸盃主場六戰五勝共轟入十九球，唯一敗仗只係對班霸拜仁慕尼黑，強勢出擊信得過。凱沙今季鋒力嚴重削弱，聯賽四場作客只得一分合共只入一球，上仗不敵史特加後，隊長泰費特仲喺電視訪問中嚴厲抨擊隊友踢得曳，賽後被教練古斯「照肺」，士氣隨時受挫。


柏林聯殘陣碌唔起「卡」


此外，黑柴仲睇中德乙柏林聯主場對卡爾斯魯厄，近七場聯賽只得兩分嘅客軍面對主場四連勝嘅柏林聯，表面處下風，但卡爾斯魯厄上仗鬥到完場前至畀榜首格雷特霍夫逼和，演出大有起色。相反柏林聯傷兵成災，除馬度尼、史達夫、泰路迪同主力射手卡路士施維奧繼續養傷外，門將賀達基同守將高列特都加入傷兵行列，本周噩耗未停，主力中場馬高斯卡爾同隊長馬圖舒卡同告因傷缺練，今晚上陣機會唔樂觀。主隊柏林聯傷咗大半隊主力，卡爾斯魯厄2倍「讓球客勝」同3.8倍客W都有得諗。




（周六晚7時開賽）