林志堅踢港隊？咪傻啦！

猪拉多纳

16/10/2011
文： 波男

漢堡小將林志堅係近期本港球迷熱話之一，皆因佢老竇係香港人，球迷睇住呢位港人之子踢德甲亦分外有親切感，好多球迷仲希望佢返嚟踢港隊添！不過畀着你係林志堅，你又會唔會揀香港隊呀？




喺歐洲足壇，球員擁有雙重甚至多重國籍係好平常嘅事，除咗計自己出生地，父母同祖父母來自邊個國家都計，仲要計移民入籍同喺邊度踢波同生活，所以經常有新聞話某某球員可以自由選擇代表邊個國家比賽，不過只要一揀咗代表邊隊，就唔可以再改變。




甘莫蘭尼斯係阿根廷人，佢揀咗代表意大利，喺06年捧起世界盃冠軍，迪高係巴西人，但就選擇代表葡萄牙南征北討，由於林志堅父親係香港人，雖然佢一出世已係德國籍，但亦可能可以選擇代表香港隊，但係首先要諗諗，香港足球有咩嘢吸引到佢先？


話同香港冇關係已好客氣


林志堅為漢堡上陣，香港與內地粉絲同感雀躍，德國球圈亦好哄動，連德國領隊勒夫都入場考察，林志堅依家有三個選項，A德國、B中國、C香港，點揀都冇理由揀香港啦吓嘩！




要林志堅揀香港，只有一個可能，就係香港隊已經成為世界級勁旅，至少要去到日本嘅級數。菲律賓傭工爭取居港權，係因為佢哋原居地條件唔及香港，林志堅話自己同香港並冇關係，所以唔會代表香港，其實已經講得好客氣，好多嘢都唔使講到咁白嘅。