「Goal美斯」着火 拜仁射爆拿玻里

猪拉多纳

18/10/2011
文： 走肖

有時人生好似坐過山車，馬里奧高美斯就係最佳寫照！歐聯第3輪分組賽今晚開打，拿玻里喺「死亡A組」主場對拜仁慕尼黑，唔似頂得住，皆因馬里奧高美斯捱過低潮後，最近變身歐洲最恐怖射手，勁到連車路士都話要開價3,400萬鎊斟佢，有佢幫手拜仁夠條件開1.85倍客W。（有線63及203周三凌晨2:45直播）


拿玻里傷兵多


出道初期喺史特加狂入波嘅馬里奧高美斯，轉會拜仁後曾經淪為球迷柴台對象，對住空門都可以射失，甚至連正選位都保唔住。不過上季開始佢已經重拾殺手本能，而且今季拜仁連盃賽有12勝1和1負，當中佢有份入波嘅7場比賽贏晒，敗家仔變福星，據聞拜仁已準備好份肥仔新約引佢留低，車仔亦打算高薪搶人。




雖然拜仁翼鋒洛賓未好番，但前鋒奧歷經過長期養傷後，剛啱喺聯賽復出，前線牌面更加強。對家拿玻里喺分組賽打和曼城又砌低維拉利爾，當然唔好惹，弊在今季新簽嘅前鋒彭迪夫、中場當拿度同後衞比圖斯全部有傷唔踢得，賽程咁密，難免會影響佢哋嘅排陣同部署，聯賽輸完畀帕爾馬可能衰多場。