撐皇馬「主勝」有道「里」

猪拉多纳

18/10/2011
文： 朱楓

不是冤家不聚頭！皇馬同里昂呢對死敵，今晚又會喺歐聯D組碰頭。過往交手里昂佔盡上風，但時移世易，「銀河艦隊」近況弗到漏，最緊要係今晚有「寸王」同馬些路刑滿，希古恩同賓施馬呢對大勇箭頭好可能一齊擔正，一於捧1.52倍「讓球主勝」！




（有線62及202、中央5台周三凌晨2:45直播）




皇馬同里昂近年認真有緣，今屆已經係連續第3屆喺歐聯被抽入同一組，05年起計仲已經係第5次，前幾年交手皇馬鋪鋪被里昂恰死，不過近年開始好轉，上屆更成功打破宿命，主場大勝3:0。今晚兩隊再交手，朱楓認為皇馬可以再下一城，事關「銀河艦隊」今季真係弗到爆，頭3輪西甲主場轟入14球，創出近62年最佳。


利辛度盧比斯未傷愈


當中希古恩上場對貝迪斯又連中三元，連埋之前幫阿根廷踢世盃外，對上4場3度上演帽子戲法，搞到今場會同左閘馬些路刑滿嘅教練莫連奴，話有幸福嘅煩惱：「賓施馬今季有個好開局，但希古恩近排就頻頻入波，我真係唔識點排正選。」西班牙《阿斯報》尋日爆料，指「寸王」今場好可能派晒佢兩個一齊擔正，配合啱啱第100次為皇馬上陣嘅C朗同愈踢愈好嘅卡卡，戰意唔使懷疑。




對家里昂今季玩低調，暫時法甲排第3表現都算唔差。早兩日佢哋主場對南錫，更有養傷多時嘅後防主力克里斯同中場哥古夫復出，可惜前線最孭得飛嘅射手利辛度盧比斯，據報足踝傷勢仲未好番多數趕唔切復出，作客皇馬可以話九死一生。