車仔夫添屈機 炒起殘陣亨克

猪拉多纳

19/10/2011
文： 朱楓

車路士近況大勇，唯獨隊中有位球員就唔太開心，佢就係「王子」費蘭度托利斯嘞，好彩領隊保亞斯冇忘記佢，暗示今晚歐聯E組主場對住陣容甩皮甩骨嘅比利時球隊亨克會派佢擔正，斷估「王子」唔會放棄呢個再次證明自己嘅「餐士」啩？淨係睇呢點，就算車仔「-2」都值得照捧1.72倍「讓球主勝」啦！（有線62及202周四凌晨2:45直播）




由於早前喺對史雲斯時領紅被罰停賽3場，費蘭度托利斯將近1個月冇喺英超上陣，對上一次為車仔披甲，已經係9月尾作客華倫西亞嘅歐聯。今仗賽前領隊保亞斯暗示好大機會派佢披甲，其實費托喺坐波監前，已有復甦迹象，難得今晚有機會登場，朱楓相信佢一定加多兩錢肉緊，畢竟史杜列治近排頻頻入波，杜奧巴亦已復出，加上安歷卡同沙洛文卡勞，「王子」今晚再冇貨交，下年1月畀人賣走都似。


亨克3大攻守主力倦勤


當然除咗托利斯要爭氣，其實車仔今場都有爭分需要，學保亞斯話齋，其實車路士目前喺E組兩戰得4分，出線根本未穩陣，講明嚟緊主客對亨克目標係全取6分。值得一提嘅係，保亞斯上年教波圖時喺歐霸盃對過亨克，結果主客都大勝對手，兩回合計大勝7:2晉級，用波圖都已經咁屈機，你話改揸人強馬壯嘅車仔，邊有可能會失手？




對家亨克今屆闊別9年後再打歐聯表現唔太差，首仗主場打和華倫西亞，次仗作客僅負利華古遜0:2，不過呢支比利時球隊由嗰場起就行衰運，先有中堅拿特臣荷西足踝受傷證實要抖1個月，之後到射手禾臣同另一位中堅施馬爾斯各自打柴又要抖1個月，連失3大主力，結果近日先後不敵安德列治同洛格倫錄得3連敗，喺比甲跌落第9位，據聞教練比恩已經聞到魷魚香，今晚作客車路士想爭歐聯史上首勝？唔輸個「主其他」都偷笑啦！