洪礼贤讲马：柏宝大热门成绩极端

猪拉多纳

　　刚刚周中全泥夜宴，柏宝8场捧蛋，仲要1P都冇，当晚如「圣迪达」、「星运俊爵」，捧到大热照样死火，赛果令人难以置信。

　　有时运滞真系冇得唔信，亦唔能够拗颈，睇住嗰晚柏宝嘅坐骑「宝贝」、「圣法理」，临门会到个P，但最终影相都要输埋。

　　讲开大热门，今季上演了12期赛事，一共有109匹大热门，赢过29匹（另有23场位置），胜出率约27%，上名率47%，比率唔算特别标青，却未至於接受唔到。正如周三晚嘅「兵奇临」、「新强劲」和「赞惑」，有3匹大热门赢到，成绩算系ok。

　　如果睇番季内捧到好热嘅大热门（独赢两倍以下），为数8匹，成绩上佳，6匹顺利胜出，另外嗰两驹赢唔到亦有亚季军。而当中最热系1.4倍「幸运金龙」和「阳明飞飞」，都系由韦达经手。当然，热到十几蚊，中咗唔生肉，对小注嘅马友如我，真系帮唔到手，不过，就真系胜在稳阵！

唔入前两名即冇P

　　而暂时嚟讲，韦达大热门成绩略比柏宝好，不论胜出率和上名率（30及48%），都比後者高出约3个百分点。顺带一提，柏宝喺18匹大热坐骑之中，成绩几极端，入唔到前两名就冇Ｐ（10匹输咗嘅大热，仅1驹有第四名）！

马会赛马节目主持　洪礼贤