不來梅勢擒奧格斯堡

猪拉多纳

21/10/2011
文： 蘇斯黑柴

德甲獨腳戲奧格斯堡主場迎戰雲達不來梅，奧格斯堡上仗作客爆冷擊敗緬恩斯，取得球會史上首場德甲勝仗，全隊士氣如虹，不過今仗面對級數明顯高得多嘅不來梅好難再偷雞，黑柴認為呢場波強弱懸殊，不來梅客Ｗ有1.92倍已較預期好分，捧得過。（有線61及201台周六凌晨2時30分直播）




奧格斯堡上仗開齋但水準甚低，對手緬恩斯除咗今季人腳實力大幅下滑外，近期七戰不勝狀態極沉，奧格斯堡亦贏得極之有運，除咗要感謝卅六歲老門將贊斯屢救險球外，亦要多得球證將對手尼古拉梅拿嘅合法入球誤判詐胡。奧格斯堡近期重新執過防線，整體表現有進步，而且會方預咗降班冇壓力，球員冇嘢輸場場當決賽踢，鬥志值得嘉許，但球員質素始終未達德甲水準，今場遇上更強對手，相信爆冷可一不可再。


八次中楣柱唔夠運


「綠軍」不來梅今季有復興之勢，即使上仗不敵衞冕嘅多蒙特，但演出絕對唔曳，佢哋目前以十六分排第五，分別落後頭兩名拜仁、慕遜加柏六分同一分，但實際表現比成績更討好，今季九場聯賽已經有八次中楣中柱，係德甲最欠運球隊，排名仲有上升空間，今仗國腳門將韋爾斯停賽期滿復出，巴西鐵衞拿杜上仗亦傷愈後首次打正選，整體實力遠勝主隊。




不來梅歷來四次同奧格斯堡於德國盃碰頭都未輸過，近三次交鋒全勝包括兩次作客恩普斯球場，今晚一樣可以憑質取勝。