史達比克誓做莫迪攔路虎

猪拉多纳

21/10/2011
文： 亨格比利

由「娃娃臉射手」蘇斯克查領軍嘅莫迪，今晚喺挪超獨腳戲造訪史達比克，如果呢支「一哥」今晚贏波嘅話就有機會提早封王。之不過史達比克近期走出低谷，賽前仲喺Facebook開埋群組煲大場波，擺到明想搞寸莫迪個封王Party，1.57倍「讓球主勝」似乎捧得過喎！（開賽時間：周六凌晨1:00）




蘇斯克查後備落場入波就撚手啫，估唔到佢教波一樣咁耍家，首季執教莫迪喳嘛，已經帶隊拋離次席嘅特林素8分高踞榜首，今晚全取3分而次席嘅特林素喺本輪失分嘅話，莫迪就會歷史性首度捧走聯賽錦標，就連當地網站《fotballsim》搞嘅網上投票，都有96%球迷睇好佢哋封王，睇嚟錦標都走唔甩ｏ架嘞！




之不過聯賽仲有4輪，要捧盃仲有走盞空間，況且莫迪近5場聯賽有3仗失分，踏入季尾走勢似乎有些微回落喎！


波飛減價吸納Fans入場


何況史達比克來季將會搬竇，今季只係剩番兩場主場賽事，會方賽前特別將門票減價到50挪威克郎（約69港元），藉以吸引更多球迷入場，繼而仲喺Facebook開咗個群組呼籲Fans進場打氣，咁齊心照計可以頂得住莫迪。