北方打吡漢堡大變天

猪拉多纳

22/10/2011
文： 蘇斯黑柴

德甲尾場上演北方打吡，漢堡主場迎戰禾夫斯堡，漢堡上仗作客贏弗賴堡，近三場聯賽取得兩勝，不過今仗由新帥芬克領軍，佢決心改造球隊，球員要時間適應，今晚遇上攻強守弱嘅禾夫斯堡，黑柴寧吼入球大。（有線61及201台周日凌晨零時30分直播）




漢堡近期成績有改善，暫代教練卡度素沿用前a度主帥奧寧嘅陣式，只係用人更加恰當，不過今仗新官上任，芬克係前拜仁球員，執教巴素利亦有豐功偉績，但佢對自己嘅工作極有主見同執着，上任後立即改變陣容同踢法，部分球員賽前已表明需要時間適應，而最大受害者相信係港人二代林志堅，根據德國《踢球者》網站預測，林志堅今仗甚至未能進入大軍名單，至於上季至今都有好表現嘅南韓小將孫弘民亦退居後備。




漢堡陣營賽前亦傳來不利消息，上仗停賽期滿，加盟後首次為漢堡上陣即入波嘅伊利斯域，竟然喺操練中受傷，腿筋撕裂預期要養傷三周，令球隊今仗爭勝蒙上陰影，不過唯一可以肯定嘅，係芬克崇尚進攻足球，今仗主場踢打吡戰必定搶攻。


禾夫斯堡防線不穩


禾夫斯堡近期演出反覆，作客更加四連敗，上仗主場對紐倫堡，教練馬加夫竟然一口氣派出從未有德甲經驗嘅小將中堅科爾普同中場奧漢祖奧路斯高擔任正選，最後險勝二比一但計表現並唔值得攞晒三分，球隊防線明顯不穩。漢堡喺炒咗前主帥奧寧後三戰全開大盤，禾夫斯堡近七場聯賽亦有六場開大，漢堡近四次主場對禾堡每仗雙方都有波入，其中三場開大，今場再追大盤。