巴塞超班照炒西維爾

猪拉多纳

22/10/2011
文： 鄭少偉

巴塞隆拿喺西甲超晒班，特別係主場戰績勁到冇朋友！4戰全勝入21球，一般貨色作客去到魯營同送死冇乜分別。西維爾係就係有啲卡士，但始終唔係巴塞個檔次，「亨利」相信佢哋今晚好大機會喺魯營「大」敗一場！（now632及660台、廣東體育周日凌晨4:00直播）




未講今晚場波前，先講少少上周日旺角場重開，我哋日之泉JC晨曦主場第一出擊，就吸引到差唔多4,500名球迷入場，場面墟冚。咁多球迷捧場，我同一班隊友自然踢得特別起勁，相信呢個情況就同巴塞每逢喺魯營比賽，表現特別醒神一樣。


碧基養傷 佩奧爾狀態差


魯營係全球數一數二嘅球場，全場爆滿可以坐近十萬人，淨係球迷吶喊助威嘅氣勢，已足以嚇窒對手。小弟早兩年有幸跟當時効力嘅傑志去西班牙集訓，雖然未有機會落魯營掂波，但近距離睇到個草地，嘩！靚到呀，一啲多餘雜草都冇，長度亦非常講究！就連巴塞嘅練習場，草地質素亦同樣出色，我哋鬥波個陣無論畀波同扭波，都好似唔使點用力咁，一推就去！巴塞班球星個個腳法上乘，草地靚更有利地面進攻，唔怪得客軍去到魯營都畀人搓馬騮咁玩！




講真，就算西維爾近況再好，唔夠班就點都好難爆冷。但考慮到巴塞三線主力輪流傷，好似今仗有中堅碧基打柴，傷愈冇耐嘅隊長佩奧爾又狀態麻麻暫列後備。雖則話馬斯真蘭奴做替工尚算稱職，但始終唔係佢專長，遇到客軍簡路迪同捷西斯拿華斯呢啲卡士嘅鋒將，失波一啲都唔奇！


法比加斯復操士氣升


但都係嗰句！巴塞恃住鋒力強勁，就真畀你西維爾入到波又點？失一球入番你兩粒咪照贏？何況法比加斯正式復操，今仗有機會上陣，對班波係一大鼓舞，所以就算巴塞今晚讓2球，同埋入球中位數3.5球，「亨利」照撐「讓主」同埋入球大，博收晒兩瓣。最後點都要賣吓廣告，晨曦今日晏晝會再次喺主場旺角場出擊迎戰流浪，加上仲有港菁對南華，雙料娛樂非常抵睇！


巴塞隆拿半場早入局


‧近8場6勝2和，連續5場半場已領先。

‧美斯目前10個聯賽入球全部喺主場取得。

吼實西維爾輸0:4波膽

‧近8場4勝4和，當中有4場保持不失。

‧近6次作客巴塞1勝1和4負，有3場輸0:4。