棟悉先機：威威多星升班照殺

猪拉多纳

　　谷草日賽，有時幾似全泥宴，一季上演次數少之又少，不過，久唔久就爆鑊杰，而上周三晚泥戰已經開咗條四千幾蚊Q，又睇吓今日部分場次會冷成點。至於今期焦點，巫斯義係唔錯嘅選擇，出馬唔少，實力馬有幾匹，隔晚騎師王賠率佢有8倍，有得諗。

　　第六場三班1200米。「享耆成」前仗初跑谷草，喺1000米贏得幾清脆，二三名「勁有盈」及「精靈勇駿」，俱為谷草短途好手，末段一樣唔夠鬥。上場轉到此程即成績倒退衰喺賽事形勢，全程三叠，馬王都唔掂，所以，跑到殿軍算佢好嘢。今仗執到1檔，簡直係天大喜訊，而更大喜訊係主要對手「帝豪駿駒」排11檔，此消彼長下，贏面大增。

　　第七場三班1000米。「勁闖駒」上場唔係輸喺實力或狀態，而係陣上對手唔生性，喺最後幾百米畀「奪寶」閂去應有跑線，搞到佢要勒避及失晒平衡。呢次轉到谷草1000米，場地冇問題，6檔係有啲風險，好在佢夠快，早段要搶佔前列唔難，有力帶到。

　　第九場二班1200米。「威威多星」的確係新一代谷草1200米強者，跑幾場交到上佳成績，由於過去跑得唔多，計埋上場，亦只不過出賽10場，里程仍新，博繼續進步好正常。事實上，剛仗贏來不費吹灰之力，入到直路一擺正軚，完全當啲對手冇到，感覺上好似行過一堆班內好手。以呢種姿態嚟講，三升二班，邊會冇得揮。

點買法

　　開場白都話捧巫斯義，一於整條獨贏2 x 3「享耆成」搭「勁闖駒」，但唔買孖寶，費事蝕水。而重心QT揀第九場，「威威多星」咁穩陣最好做膽，拖幾匹熱門，希望呢場咪爆，建議配腳為２６８９。

資深評馬人　陳華棟