費Sir莫帥良師典範

猪拉多纳

23/10/2011
文： 黃興桂

Peter上周中睇完第三輪歐聯分組賽，可以大膽預計今屆歐聯冠軍應不離皇馬、曼聯、車路士及拜仁慕尼黑，最主要原因係他們都有一位好教練。雖然唔少球迷都唔鍾意莫連奴嘅敢言作風，但有時不得不佩服佢嘅執教功力，喺佢調教之下，法國前鋒賓施馬今季無論在盤、傳、射方面都有極大進步，除咗能夠自己爭取入球，亦能走位配合其他隊友，應射則射、應傳即傳，演出漸具大將之風。


寸王令賓施馬升呢


當初莫連奴執教車路士之時，杜奧巴仍是一塊未經雕琢嘅寶玉，但在莫帥引領下，杜奧巴成功盡展所長，晉升成為歐洲頂級前鋒，莫帥知人善用絕對功不可沒。自從莫帥離開車路士，杜奧巴表現亦不復當年勇，證明一名好教練對球員係幾咁重要。世上千里馬好多，不過未必全部有機會遇上伯樂，賓施馬遇上莫連奴，大有機會進身頂級前鋒之列。




費格遜執教曼聯超過二十五年，令紅魔鬼成為世上最多球迷兼最成功球會，領軍功力之高已經唔使多講；拜仁在老帥軒歷基斯帶領下，今季演出亦愈見穩定；車路士領隊保亞斯亦係一名好領隊，但需要時間及成績去證明。Peter期望香港教練能夠學習外國領隊嘅訓練思維，發掘更多具潛質嘅年輕球員，本港球壇自然有希望。


金句：賓施馬盤傳射升呢 莫帥盡顯良師風範