雙雄總身價92億

猪拉多纳

23/10/2011


冇番咁上下實力、財力、兵力，又點排英超頭兩位？曼聯近年橫掃英超，上季破紀錄取得第十九次國內頂級聯賽冠軍；曼城有中東巨富文梳亞全力撐腰，已變得球星如雲，對比起同市死敵毫不輸蝕。據德國傳媒統計，「曼市雙雄」兩軍人腳，加埋身價高達8.5億歐元（約92億港元），星光熠熠叫球迷目眩！


朗尼估值5.8億


德國著名網站《轉會市場》，對兩軍合共54名球員進行身價估量，曼聯29人約總值4.053億歐元，而曼城25人則共值4.335億歐元。




兩軍當中，以朗尼身價最高，網站指佢至少值5,400萬歐元（約5.8億港元），而阿古路及泰維斯身價為4,000萬歐元（約4.3億港元），而尼曼查維迪、拿尼等亦身價不菲。睇番雙方正選十一人，齋計朗尼、查維亞靴南迪斯、拿尼、艾舒利楊格、菲爾鍾斯、迪基亞，身價已約值2億鎊；而曼城一條攻擊線阿古路、迪斯高、巴洛迪利、大衞施華、拿斯尼，加埋身價亦勢必去到1.5億鎊，認真誇張。




計雙方老細身家，格拉沙家族當然唔及文梳亞咁犀利，但曼聯貴為全球其中一間最受歡迎球會，商業價值爆燈，只要佢哋開聲要錢，銀行、贊助商都唔會托手（月爭），所以未來如有需要，將隨時再買入球星；曼城更加唔使講，如本季未能一直保持強勢，一月轉會市場一開，佢哋就必定有重磅收購，而嚟緊會打破C朗8,000萬鎊轉會費紀錄嘅球會，好大可能就係曼城！