洪禮賢講馬:福陞 趁弗再搏

猪拉多纳

　　第六場三班1200米。「佳同」初出同程入P唔係易，事關8月中先至開始做嘢，9月試大閘仲要出力省，進度頂多八成。而此駒在比賽前，因閘前搞咗一輪先肯入閘，情緒已受波動，結果出閘反應唔好，焗咗喺好後位置，入正直路喺大外叠衝，已經幾蝕章，同時，騎者推騎節奏及控制上，唔係好夾到隻馬，但一樣撲到上嚟，睇嚟分數雖在歷來高位，未算綁手綁腳。今仗寧負重仍用番柏寶，孭多11磅，唔排除影響大，但另一方面，或可發揮出最佳水準，計落未必冇賺；望望今場對手，會擺前走至少3駒，局勢唔會不利追，有埋3檔，唔使留得太後，末段鬥爆唔會失禮。

　　第七場三班1800米。「福陞」本來好大機會喺上場同程入Q，直路中段被夾係主因，而臨門一兩步騎師未夠努力亦係關鍵，不過，初跑谷草可夾在兩匹有晒根據及好開嘅馬，已經好本事。其實，上賽前已指出初出點解跑得咁差，鞍上人係癥結所在。既然初跑谷草長途，以及轉人後有咁好效果，趁狀態跑起繼續喺此程搏，合情合理。