馬主論戰

猪拉多纳

新三刀王拔頭籌

　　文家良剛啱贏咗隻「最佳孖寶」，我睇好呢個倉今晚繼續有馬贏。推介頭場「新三刀王」，上季一再響四班跑近，今次首度落到五班作賽，對手實力差一截，應該可以順利打開勝門。

　　另外要追多次第六場「但求勝」，上場畀同場隻「奪寶」搶咗前領位置，結果交唔出應有水準，今次如果能夠順利放出，應該會有唔同表現，始終呢匹「但求贏」子嗣質素唔錯，可以畀多次機會。

張敬山

田園名駒四班惡

　　葉楚航剛啱憑「仔仔女女」爆冷捧盃，睇嚟呢個倉啲馬已經操起咗，攻勢應該陸續有來。鍾意第四場「橫亨」，上場以後備身份補上，結果喺谷草1800米順利開齋，勝後只加五分，繼續留響五班上陣，要再贏冇難度。

　　另外推介第五場「田園名駒」，前仗響三班田草1200米都跑第四，依家落番四班跑，仲要配吳嘉晉唔使孭重磅，真係着數到暈，坐位望贏。

任達華

追月換人見真章

　　剛啱柏寶憑「幸運紀錄」同「金獅名將」起孖兼封王，搏殺手風好順，今晚騎足八場，隨時可以冧莊騎師王。推介第六場「佳同」，上次跑1200米，末段如狼似虎咁撲上嚟跑第三，後勁唔簡單，今次可以補中。

　　另外鍾意第七場「追月」，前仗輸畀頭馬「蓋世子牙」唔夠一個馬位入Q，表現唔曳，回氣一仗之後，換柏寶操刀會有唔同演出。

寇鴻萍、梁廷鏘