藍翼報仇薩氣騰騰

猪拉多纳

26/10/2011
文： 蘇豪

亞冠盃四強戰次回合開波，卡塔爾代表艾薩德同南韓大軍水原藍翼首回合踢到講手，最終艾薩德作客贏二比○。今場雙方共有五名職球員停賽，艾薩德回師主場出戰，但失去兩大進攻重心卡達基達及尼安，戰鬥力大減，藍翼作客讓波盤口硬淨，捧上盤！




（now 671周三晚11時直播）




兩軍首回合踢出火，艾薩德射手尼安比賽末段冇理對手球員受傷繼續進攻，仲為球隊射入第二球，引發雙方球員毆鬥。經過商議之後，亞洲足協決定判罰涉案主角停賽，艾薩德兩大射手卡達基達及尼安都要坐波監，守門員教練沙巴阿里亦需停賽，另一邊廂水原藍翼教練團成員高宗秀及射手列斯迪均需坐波監。


艾薩德雙箭頭停賽


艾薩德首回合於一片爭議聲中贏波，實際踢落唔算特別好，只憑射手尼安以一己之力獨建兩功，但今場此子與另一箭頭卡達基達都唔在陣，肯定嚴重削弱攻力。艾薩德首回合作客贏波，今次返主場出擊都有得受讓，個盤睇落的確好筍。不過，莊家並非開善堂，如果今場艾薩德贏得，又點會咁大隻蛤乸隨街跳吖！




若單以實力計算，水原藍翼級數必在對手之上，大軍首回合於主場失威，仲要輸得咁唔抵，今仗必定大打真軍，務求於客場贏波挽回面子，現時小讓平半可以博上盤！