福到多多定做善風中國神農

猪拉多纳

　　今晚谷草C欄賽事，擺前走着數，檔位亦唔易跳出1至6檔嘅框框，因對上3期24場頭馬，只得4W係7檔或以外，比例實在偏少。

　　 韋達停賽復出，唔建議對佢太熱情，唔係話佢冇馬贏，但部分坐騎如過熱的話，要多加思量。

重心場次　第3場　第四班（60-40分）1200米

　　「軍士」冇配件、路程唔啱、初出唔好，一樣喺上場入Q，仲只係輸少少，剛仗賽績好有指標性。今加程至1200米，點都好追啲，加上淋地又得，有權補中。

　　「閃耀小子」啱啱贏同程，締速快過當晚其中一組三班，加7分留原班有賺。「超晒班」，7檔略尷尬，但過去8場四班此程，僅1場因氣管有血冇前五名，級數可知。

　　「龍得風雲」終於正正常常加番眼罩，開始有「胃口」，而評分為服役4季最低，其實已有利，係驚地慢有點影響。「浚鋒天河」比對分數與上季同期相差接近廿分，而對上兩季初出（同程）亦上晒名，計數要拖。

第1場　第五班（40-10分） 1200米

　　「英雄得勝」出腳及頭側問題未改好晒，但落五班已具優勢，係睇吓地慢得唔得。「叻先生」反正後追，11檔冇所謂，而上賽喺最後100米被干擾嚴重，仍有殿軍已不錯，今仗加程應會好。

　　「盈驥」、「馬中神駒」及「偉感」，有權爭入圍，但統統有缺點，前駒在季內已搏至第3仗；「馬中神駒」位靚，惜此程不及1000米；後駒傷出，有陰影。「京城精英」和「咁都得」，目前分數有賺，尤其前駒，後駒則尊重新勝。

第2場　第四班（60-40分） 1650米

　　「福到多多」係擔心3季初出未好過，但見今季喺備戰顯然與上季初出之前唔一樣（上季冇大閘，備戰約1個月。今季操咗兩個半月及試埋大閘），而進度嚟到埋門愈覺吸引，只要今場唔係冇得追，末段佢唔會冇得「騷」料。

　　「定做」夠跑頭才增程，應係目標。「中國神農」均速馬回到中程，撞啱冇步速，如慢放，可能有意外收穫。「奄尖大少」淋地唔多啱，場地正常尚可爭腳。「善風」讓路先會喺上場跑1200米，繼續輸唔遠，證明狀態擺咗喺度，回到中距離未必會等降班，小心。

第4場　第五班（40-10分）1800米

　　「橫亨」新勝此程，採主動跑法有良好效果，只加5分，其實唔會有壓力。「康樂名駒」如果變化地，未必應付到，太熱的話，做腳算了。

　　「華麗堡」及「恭喜發財」，跑法傾向前中置，喺今場可能由頭賺到尾。「壽比南山」就算唔計上場早段馬鞍滑移及搶口，引致大敗，再之前兩仗都跑得唔好，所以，忽然有番表現，當抽水吧。「魅力影子」集中谷草，會比田草為妙。

第5場　第四班（60-40分）1200米

　　「田園名駒」一再引證三班「高攀」唔起，落四班會係另一回事，今只負123磅，如有慢地性能，什麼也不怕。「金財子」回跑此程，夠速度領放，4檔較易切入，或可放返。

　　「金鑛龍華」冇辦法之下，嘗試縮程及轉回谷草，但跑落真係似高估咗，「分手」前送上祝福吧！「中國好」及「超勝」納於邊線。

第6場　第三班（80-60分） 1200米

　　「佳同」明知用柏寶要負重，仍棄小將，求人馬合拍，多過借助10磅。而上賽劣勢可入P，演出有睇頭，若果有淋地底，爭勝機會大。「駿蹄飛」曾缺課，但上季同期亦有類似問題，結果初出一樣可輕勝，此外，目前馬重回到當日水平乃好現象，唯一係要博心律不正後跑唔跑得番。

　　「馬風雲」上場有揀，已指出安排更勝上季同期，贏得唔算辛苦，希望新鮮感唔係冇晒，尚可一爭。「但求勝」今場形勢與上賽不同，對手冇咁對抗性，跑法上有利。「金鑽龍華」有機會咬住前駒置前，或可賺埋一份，加上，轉回谷草對手唔同，可能攞到着數。「點石成金」跑落係咁上下，應該係時候試吓增程。

第7場　第三班（80-60分）1800米

　　「福陞」及「勇鋼」，各有可取地方，前駒勝在已有路程經驗，後駒則叻在上賽早段跑得肉酸卻追得勁，頭馬應在其中。

　　「駿馬精英」一旦養得番，目前分數喺三班有賺。「軍花」剛仗已用嚟行頭，其實贏完上班及加程，唔覺阻力大，係擔心檔位問題。「安穩」和「追月」，前駒1檔預咗慳晒腳程，後駒則識喺淋地追，俱可作配。

第8場　第三班（80-60分） 1650米

　　「正黃旗」漸漸適應到慢步速，冇上季留得咁辛苦及兩頭擺，稍有進步其實已夠喺現時分數爭勝。「帝豪名駒」地利大過天，要拖一票。

　　「揀得正」初出表現略比預期好，睇嚟目前分數未盡晒。「十足十」埋尾拍跳主動性強，唔係冇態，而今場終排好位及跑一哩，係咪唔夠班，睇多次。「魅力星」與「朝東飛駒」，只宜拖腳。

馬會賽馬節目主持　洪禮賢