曼城主場補擺狼宴

猪拉多纳

29/10/2011
文： 車車

相隔幾日，再度重遇你！講緊嘅咪係曼城同狼隊囉！佢哋兩隊啱啱喺周中英格蘭聯賽盃交過手，今晚英超又再鬥過，今次轉換場地，輪到曼城有主場之利，但相信結果都係相同，曼城可以再大勝一場。




（有線300及200台周六晚10時直播）




睇完上星期日曼市打吡後，再次證明乜叫齊心就事成。雖然曼城同泰維斯爆內訌，但就無損一班球員士氣，繼續波照入，所以先有六比一「屠魔」，跟住周中又以五比二「殺狼」，呢隊曼城比起有泰維斯喺度嗰陣仲勁，至少唔使遷就呢隻野獸先，以曼城依家嘅狀態，可以話係遇神殺神，遇佛殺佛！


狼隊作客2連敗


經過一連兩場作客，曼城今晚返到自己地頭，相信一樣可以炮製入球騷。依家射手榜頭十位球員，曼城佔三席，包括阿古路、迪斯高同巴洛迪利。有親佢哋三位上陣入球必多，加埋拿斯尼同大衞施華偶有佳作，嚇到對手失晒魂，難怪近三場有兩場對方都擺烏龍球啦！




至於狼隊，今季踢九場英超只贏過兩次，佢哋已經連續兩場作客輸波，上場主場對曼城都輸得咁慘，更何況今場作客？呢場投X真係多瓣數，大膽啲可試「主其他」。如果想穩陣啲，就不妨試「讓球主勝」或入球大。




「車車」在1998世界盃至今已成「資深球迷」，2001年起在電台主持年輕人節目，2005年起主持電台足球節目，2010年底加入球彩台，主持《球彩俱樂部》及《球盤龍門陣》，並參與每周足球賽事直播。

phone波熱線：1831 678

電郵：soccer64@cabletv.com.hk

開放時間：「超級星期六」晚上9:00至深夜2:30