祖記下盤米走寶

猪拉多纳

29/10/2011
文： 巨高

本周意甲其中一場重頭戲為意大利國家打吡，由國際米蘭主場對祖雲達斯。兩支球隊積怨已久，敵對指數肯定係全意甲最高。就趁今季國際米蘭處於低沉期，祖雲達斯今次去到聖西路球場勢必盡情發洩，甚麼新仇舊恨今晚了斷，祖雲達斯受讓平半，必揀下盤。（中央5台周日凌晨2時45分直播）


電話門事件舊怨未消


祖雲達斯對國際米蘭不滿事件多籮籮，最近期必定係06年嘅「電話門事件」。呢宗醜聞已令祖雲達斯身敗名裂，而國際米蘭仲乘機踩多兩腳，要求意大利足總將祖記被褫奪嘅當屆意甲冠軍名銜轉畀國米，搞到祖記上下極之憤怒。雖然事隔幾年，球迷對呢件舊恨仍未忘記，正等待球隊替佢哋抒發心頭之恨。




另外，自快意車廠派家族成員安迪亞阿尼利揸旗之後，呢位祖記新會長就經常批評國米行為無恥，以偷取冠軍名銜為樂，仲話要舉出新證向足總取回公道，可見管理層對國際米蘭一樣恨之入骨。實在祖雲達斯呢幾年來谷埋成肚火，今晚踩入聖西路，梗係要盡情宣洩不滿情緒。而咁啱今季國際米蘭步入低潮期，就算換上雲尼亞里執教都冇乜改善，絕對係祖雲達斯復仇嘅良機。「斑馬兵團」一對大勇前鋒馬特尼同胡仙歷都冇傷冇病入球頻頻，中場派路及馬治斯奧今季又長期見勇，爭勝本錢充足兼有復仇鬥志，作客聖西路都唔使驚。


傷情嚴重防線有死穴


國際米蘭今場都幾大鑊，首席門將施薩索拉斯及中堅森美爾受傷，而中堅蘭奴捷亞又未出得，所以捷禾好可能要移入中路。實在捷禾頭部受創後已經相當「錫身」，五五波一定唔會搏，呢個隨時成為國際米蘭死穴。




至於新加盟前鋒科蘭同樣因傷缺陣，攻力自然要打多少折扣。仲有下周中國際米蘭要出戰歐聯，或影響到球員喺意甲嘅發揮，讓平半，一定係反主隊。