洪禮賢講馬:勁飛揚領彩進攻足球無雙小子 紅旗勇將齊歡唱幸運精彩夢仙

猪拉多纳

　　睇過隔晚賠率，好多熱門都低水，可能係大賽日關係。而熱門馬多數集中喺3位騎師身上，韋達、柏寶及白德民，最多嘅梗係前者，寄望唔好經過一晚四捷後，忽然走樣。另外，巫斯義今日騎好多東廐馬，近乎隻隻有飛，講到機會，有部分唔錯，應該有着落。

重心場次：第5場 第四班（65-40分）1400米

　　「勁賽王」初出七八成水準仍贏3乘幾，過程既蝕又走規唔定，加12分唔算多。今仗佢最大敵人係加程及加磅，只要唔係因呢兩點完全拖垮，可連捷。

　　「超級精神」加程合理，因一再見到末段要撻好耐，同時，因跑長200米，可拉近與前駒實力分野。

　　「有盈有利」再跑中程已不合。「城市之都」如加罩改善到尾段變速力，或可提升名次。

　　「勝利駿駒」轉到此程冇問題，不過，外檔或難倒此匹細粒仔。「好食德」剛仗輸到唔似真，不宜太介意。「明興寶寶」和「事事順意」，可作TF腳之選。

　　
第1場 第四班（60-40分）1200米
　　

　　「五星酒店」首仗直路受意外影響，拖延了衝刺時間，但短直路仍可大幅提升名次，後勁犀利，按理轉場會更好。

　　「錦衣衛」一早見好，終於登場，以目前進度，初出已有權贏。「名馬」終歸係插班第1仗，明知有質，卻有一定考驗。「履皇朝」加程方是正確方向，恐會追唔切，最多爭P。

　　
第2場 第五班（40-10分）1400米
　　

　　「無敵福星」朝早走過成日好風頭，轉倉後至少喺觀感上有唔同，寄望落場跑亦可交到比前唔同嘅能力。

　　「放縱」今場冇乜馬走，係得佢同「勁辣椒」，若步速控制好，B+2欄對發揮有利。「陽光王子」又排外檔，驚又似上賽全程在外落單，但計馬五班好超。「飛天龍駒」和「華獅」，後勁比大部分對手強，不過難有把握。「團隊福星」跑短200米或應付得來，冷門可敲。

　　
第3場 第四班（60-40分）1200米
　　

　　「夢幻十一」初出在谷草「外遊」，但末段湧番上嚟幾勁，轉大場唔使應付急彎，對發揮幫助大。

　　「足球快綫」上場換了一大堆配備，或是跑番好主因，不過，去到終點前其實力度漸減弱。「清風駒」曾在同程跑贏「駿方」，惜排14檔。「喜寶龍威」早課有進步，脾氣改善咗，心情漸懂放鬆，可能陣上追得仲勁。「白鹿勁」做好準備對準降班一戰，只係擔心此廐馬初出跑唔出水準。

　　
第4場 第二班（100-80分）1800米
　　

　　「醒目精英」唔係直路頭前路受阻，上場未必追唔到，不過，證明前仗勝後加分冇壓力，今轉戰長途，夠氣的話，贏面大。

　　「喜蓮智星」預咗賺晒形勢，睇吓捱唔捱到尾。「愜意小開」剛敗與實力無關，再跟。「旺國手」剛在臨場所見，身色俱備，跑至現階段，已跑起狀態。

　　
第6場 第四班（60-40分）1600米
　　

　　「勁飛揚」負重能力未知，不過，加程卻有助，希望加配件亦會幫到整體發揮（上場末段去到好後至加速到）。「進攻足球」回一回，以及換人，俱為利好因素。

　　「無雙小子」略嫌上場發力過早，如騎者拿捏準啲，有P望。「領彩」退出後冇停過課，之後試閘自動波追上嚟，睇嚟進度比前更好。「電訊超星」和「正榮」，有條件喺前列返嚟，但要發揮唔可以錯先得。

　　
第7場 第三班（80-60分）1600米
　　

　　「非常精」剛仗已揀，實際表現比預期更好，唔係搏散咗，有力補中。「自由港」新勝轉用小將，加磅有限，如處理上唔蝕過上場，仍有勝望。

　　「火熱動感」前仗大敗完全唔似真，所以，上賽前建議拖多次，結果跑番好，可能係熱身問題，亦可能係配件，總之有番表現就再跟。「財運」如走位比上場更主動，或食正今場形勢。「雨電風雷」近仗太多麻煩嘢，又氣管有痰、血及呼吸有異聲，可爭不穩。

　　
第8場 第三班（85-60分）1200米
　　

　　「紅旗勇將」轉場仍勝任，重磅又唔怕，加上新勝，條例夠四正。「齊歡唱」跑1200米把握大過1400米，而除晒配備有可能係好事。

　　「幸運精彩」用韋達應會執正跑法，至於縮程問題唔大。「夢仙」大閘輕勝，近況唔係冇，憂慮係外檔或有礙小將處理手法。「龍城動力」再跑短途未必啱；「魔幻大師」情況亦可會一樣。

　　
第9場 二級賽（95分及以上）1200米
　　

　　「XX繽紛」休賽耐一樣輕勝，8場未輸過，而轉戰此程梗係仲好。「共創未來」在不利跑線下仍可爭入位置，上場演出要尊重。

　　「步步快」曾缺課，恐有影響。「時尚風采」啱啱彈開「小橋流水」贏，喺今場依然有得爭。「新力勁」揀開，而有番1個月儲，此程一樣掂。

　　
第10場 二級賽（100分及以上）1600米
　　

　　「締造美麗」級數及路程性能冇挑剔，係進展未夠好，不過，熱完身點都有一定程度提升。「軍事攻略」上場跑到被問，其實，當時跑好啲根本有P，呢場加程及換將，有好冇壞。

　　「川河勁駒」沿路在外和過早發力，令上賽名次不太起眼，今仗配搭及排檔唔同晒，小心。「加州萬里」初出跑1600米應付到。「勁飛寶」上賽輸到唔似佢，其實最近大閘走得唔錯。

　　
第11場 第二班（100-80分）1400米
　　

　　「牛精大師」形勢或會有利；「好友福」負輕磅令能力大大升級，俱為爭勝分子。

　　「新希望」上班唔會輸級數。「如願以償」二班跑1400米值中上級。「超皇鷹」近兩仗未證明太多，只宜作配。「旺當家」轉到此程，未必有效果。「滿地金」應不出3仗會有睇頭。