熱刺大佬擺款

猪拉多纳

30/10/2011
文： 樂比堅尼

尋晚踢完倫敦打吡車路士對阿仙奴，今晚又上演另一場倫敦小打吡熱刺主場對昆士柏流浪。熱刺堪稱近年實力最強勁一季，陣中球星艾迪巴約、雲達華治、迪科爾輪流發威，後防鬆散嘅昆士柏流浪實在難以招架，主W冇肉食，一於向大盤埋手。（有線200及300台周一凌晨零時直播）




未計今輪前，熱刺排名第五，但唔好忘記佢哋已經對咗「Big5」其中四隊，即係話未來賽程對佢哋嚟講相對較易踢，排名絕對有上升空間，觀乎各隊季初表現，熱刺明顯較阿仙奴及利物浦優勝，若然最終打入前四取得歐聯入場券，相信球迷一啲都唔會意外。


昆士柏吞過富咸６蛋


熱刺優勢在於前線攻擊點眾多，艾迪巴約、雲達華治及迪科爾都係入球能力極強球員，而佢哋身邊仲有速度超快嘅艾朗連儂、加里夫巴利，加上全能球員柏加及莫迪歷，單計中前場球員，熱刺可以話係星味滿瀉，佢哋近六場聯賽入波都喺兩球或以上，今季八場聯賽有七場開大，今仗值得再追。




昆士柏流浪上仗以一比○擊敗車路士，但踢多兩人下仍畀對手攻到有氣冇碇抖，表現不敢恭維。ＱＰＲ防線演出有時都幾得人驚，好似月初倫敦打吡就曾作客○比六不敵富咸，睇怕今場對住攻力更強嘅熱刺都凶多吉少！