神奇利雲特唔怕奧沙 「青蛙」愈窮愈好波

猪拉多纳

30/10/2011


人又老、錢又冇、天分又唔高，偏偏西甲老弱殘兵利雲特今季就創出傳奇，聯賽打咗9周竟然取得7勝2和不敗戰績，以23分力壓包括皇馬同巴塞嘅西甲列強高踞榜首。外號「青蛙」嘅利雲特，用行動話畀大家知，有錢唔係大晒，佢哋正為實現窮「老」翁革命全力打拚！




唔似得皇馬、巴塞可以用錢用名氣盡收天下兵器，啱啱先逃過清盤厄運，家陣仲喺財政託管階段嘅利雲特想增兵，根本就只能夠接收各隊棄將。事實上，佢哋今季嘅Budget就只有區區嘅2,200萬歐元（約2.42億港元），為全西甲第2少，同巴塞嘅4.61億歐元（約50.7億港元）一比，人哋足足係佢哋嘅21倍。


總身價平過1個賓施馬


球隊全年嘅人工總支出亦係得650萬歐元（約7,200萬港元），相比起C朗同美斯薪金只及得一半。根據《轉會市場》網站嘅計算，利雲特全隊總身價只得3,440萬歐元（約3.8億港元），根本就連畀皇馬買個賓施馬都唔夠。




今夏利雲特雖然曾經動用100萬歐元（約1,100萬港元）向曼城買斷前鋒沙些度，但其實佢哋轉頭就再將佢賣畀莫斯科火車頭，成單交易只係為咗賺當中差價。其實呢班波今夏就只用咗21萬歐元（約231萬港元）去增兵，對比起忽然富貴嘅馬拉加，暑假燒咗6,000萬歐元（約6.6億港元）買人，後者嘅支出竟然就較利雲特創會102年以來累積更多。


170歲防線9戰失5球


除咗錢少，靠一班棄將支撐嘅利雲特仲要面對住球員平均年紀偏大問題，上月中佢哋主場贏馬拉加場波，正選11人陣容年齡加埋竟然係破西甲紀錄嘅346歲，每人平均約為31歲半。當中佢哋一條9戰僅失5球、全西甲次佳嘅老人防線，總年紀就達170歲，試問邊個仲敢話拳怕少壯？




皇馬巨星C朗話過，自己因為有錢、靚仔同好波所以招人妒嫉，但能夠令人衷心敬佩嘅，或者就只得呢支窮到燶、踢法醜陋、冇天分嘅老人球隊利雲特！