馬拉加強攻愛斯賓奴

猪拉多纳

30/10/2011
文： Katie

Katie不嬲都冇乜藝術細胞，但自從最近睇過比弗嘅大作之後，就挑起咗小妹條畫畫筋。呢位英國3D藝術家好犀利，隨便拎支筆都能夠畫出一隻栩栩如生嘅蝴蝶，驟眼睇同一隻真嘅蝴蝶企喺張紙上面冇分別，3D眼鏡都慳番！




睇番啲報道，知道比弗最鍾意喺街邊即席揮毫，完成大作之後仲會叫路人埋嚟影相留念，能夠做到與眾同樂嘅畫家確係好少見，Katie由今日開始會畀心機學畫畫（雖然家陣只係識畫火柴人><），希望有朝一日能夠好似比弗咁，將歡樂帶畀身邊嘅人。


愛斯賓奴對賽輸蝕


Katie嘅目標有排都未能實現，「西甲曼城」馬拉加都係一樣，要兌現媲美皇馬、登上歐聯大舞台仲有好漫長嘅路。呢間富豪球會今夏一口氣羅致雲尼斯達萊、祖亞昆同辛迪卡索拉等球星，班主哈馬達投放咁多資源，睇見隊波最近連輸3場仲要1球都入唔到，唔嬲就勢係假。




Katie上西班牙《馬卡報》個網摷過料，知道哈馬達日前着住波衫落訓練場督操，換轉老闆（目及）住我做嘢，我都會加多兩錢肉緊啦，更何況教練比歷連尼已經聞到魷魚香，試問馬拉加將帥今晚又點敢唔打醒十二分精神吖！




仲有喎，「野獸」巴迪斯達已經復操，有佢拍住雲尼斯達萊攻堅，火力絕對有保證。睇番往績，愛斯賓奴對上6次造訪馬拉加輸咗5次，家陣馬拉加等住搶分氹老細，愛斯賓奴想全身而退都難！


微博傳情 \(^O^)/


喺眾多節日入面，Halloween都算係最有氣氛嗰個，皆因成街都係妖魔鬼怪，肯定好過癮！Katie一早已經買晒性感制服，準備今晚大玩Cosplay，想知道我扮咩？賣個關子先，話唔埋大家今晚會喺老蘭撞到我呢！

Katie推介：馬拉加（勝）

外國長大，半個鬼妹仔，自細因爸爸成日帶朋友返屋企睇波而愛上足球，鍾意睇靚仔但唔會盲目追捧，最緊要係好波。