烏甸尼斯活捉「傻豹」

猪拉多纳

30/10/2011
文： 鄭少偉

自從港甲復行主客制後，「亨利」深深感受到主場威力，喺小弟心目中，兩支意甲最穩打穩紮兼實而不華嘅烏甸尼斯同「傻豹」巴勒莫今晚交手，相信必有一番龍爭虎鬥，考慮到烏甸主場戰績極堅，值得大家多多支持！




（開賽時間：周日晚10:00）




今季烏甸同巴勒莫都有個好「勁」嘅共通點，就係主場戰績超堅，主場全部比賽贏晒，「亨利」自己今季効力日之泉JC晨曦嘅旺角主場同樣保持全勝，深明主場真係有幾着數。原因好簡單，個場踢得多，邊個位有草頭、邊度有窿，避都避得快過對手啦！客隊又要適應場地燈光，好多時仲會畀主場球迷嘅噓聲招呼，入局都要一啲時間啦，入得嚟可能已經畀主隊入咗波，猛虎不及地頭蟲咪就係咁意思囉！


巴勒莫作客未開齋


烏甸雖然應付幾邊戰線，但教頭古杜連講明主力搏聯賽，其他賽事佢就唔太志在，之前睇佢派二線兵踢歐霸盃就可知一二，所以都唔使太擔心唔夠人用，又或者班球員會搏到殘。而且防守出色都係烏甸成績好嘅主因，佢哋暫時係意甲失球最少嘅球隊，最得人驚係主場未失過波，個底咁好，今場就算有主力迪拿達利缺陣，捧場客都唔使太擔心。




對家巴勒莫無錯都係主場王，弊在作客表現就認真失禮，開季至今仲未贏過，最叻都係和過一場咁大把，今晚作客烏甸睇怕只有劫數難逃。「亨利」建議大家今場捧主勝之餘，再補番多少入球細，小勝雙索咁就飽喇！