熱刺「主勝」唔係流

猪拉多纳

30/10/2011
文： 查理阿蛋

昆士柏流浪上仗對車路士贏得醜陋，喺主場打多2件都畀人撳住嚟攻，今次作客熱刺相信冇咁好彩喇！熱刺近況好到你唔信，近6仗5勝1和，加上雲達華治大踢爭氣波，區區1球絕對讓得起，小妹決定直取1.85倍「讓球主勝」！




（有線200及300台、廣東體育周一凌晨0:00直播）


昆士柏贏車仔係假象


熱刺領隊夏利列納曾經質疑雲達華治缺乏比賽狀態，之後呢位荷蘭中場就大踢爭氣波，近4場聯賽攻入5球，用行動證明自己Fit到漏，仲大讚全隊嘅表現：「當我哋踢出水準嘅時候，任何比賽都贏得到！」的確，熱刺近6場除咗作客賽和強勢嘅紐卡素，其餘5場全勝兼每場最少入2球，走勢銳不可當！




昆士柏開季賽程唔難打，目前排名第10只係假象。佢哋上仗主場對車仔打多2個都畀對手撳住嚟攻，咁嘅表現，今仗作客熱刺必定現形，小妹就唔睇好佢哋有分落袋喇。