辛尼特氣吞薩克達

猪拉多纳

01/11/2011
文： Mic少

歐聯G組競爭激烈程度可謂各組之冠，榜首塞浦路斯球隊尼科西亞只領先包尾烏克蘭代表薩克達三分，一輪賽事足以完全改變出線形勢。次席俄羅斯勁旅辛尼特餘下三場分組賽，有兩場佔地利，佢哋已保持歐洲賽主場十連勝，極具搶分優勢，今晚主場可望擊敗薩克達。




（有線62及202台周三凌晨1時直播）




辛尼特同薩克達，喺前蘇聯時代屬於同國對手，對對方實力及踢法都好熟悉。現時辛尼特整體實力高過薩克達少少，上次作客薩軍，即使兩度落後都可以扳平，可見辛尼特心理質素亦在對手之上。




最重要係辛尼特主場威力強大，已連續十場歐洲賽主場贏波，由於佢哋將連續兩輪主場出擊，相信會趁機搶晒六分，減輕最後一輪作客波圖嘅壓力。薩克達三仗過後仍未開齋，表現顯得力有不逮，今次去到辛尼特地獄主場，形勢更加危。


波圖餓撲尼科西亞


同組另一場，尼科西亞主場對葡萄牙班霸波圖，尼科西亞僅領先第三位嘅波圖一分，出線位置並唔穩陣，尤其係進入爭出線大直路，球員經驗及心理質素往往先至係勝負關鍵，波圖身為上屆歐霸盃盟主，亦曾兩奪歐聯冠軍，食鹽多過尼軍食米，相信餘下賽事會有更佳發揮。




（周三凌晨3時45分開賽）