今晚做華倫啦啦隊！

猪拉多纳

01/11/2011
文： Wendy

有人話「好波不如好運」，呢句說話好似好無稽，但又係事實。如果唔係冇運，車路士點會輸畀昆士柏流浪？如果唔係冇運，華倫西亞又點會頭三輪歐聯分組賽都贏唔到？但我始終相信，運氣唔會永遠企喺一邊，今晚一於撐華倫西亞！




上輪歐聯當我做緊巴塞隆拿嘅直播時，錄影廠嘅另一部電視就播利華古遜對華倫西亞，嗰場嘅精彩情況導致到我忍唔住分心，要係咁斜視望住隔籬場波。一開波見華倫有絕對優勢，上半場又領先，以為收硬錢；點知下半場開波冇幾耐就畀舒賀爾尼同「阿Sam」入波反勝，真係佛都有火！綜觀成場，華倫係絕對唔應該輸，我喺嗰晚節目內已經講明，下輪分組賽我買硬華倫炒利華！


利華攻不銳守不穩


今季我做得利華直播多，用「攻不銳、守不穩」嚟形容就最啱，傑斯寧質素有限，中場悉尼森姆唔在狀態，連拿度奧古士圖亦受傷，波歷克喺上場聯賽整傷個鼻，今晚有機會缺陣，咁嘅人腳，又點頂得住擅於快攻嘅華倫？