韋白杜熱門保衛者

猪拉多纳

　　望望騎師成績表，目前唯一未開齋剩低卓利，但成績唔好冇得怪佢，經常出賽機會有限，好似19/10嗰期，唔係「心明眼亮」補出，佢本應係坐冷板櫈。同時，卓利大部分坐騎俱為賽前機會唔高，像對上1期為例（30/10），冇錯，出賽場次係唔少，有8匹咁多（今季最多1期），不過，99倍W計有「鈦合金」、「信得過」、「旅遊大亨」、「喜寶寶」及「金威王子」，而當日最「熱」嗰匹，已要數到23倍「華獅」嘞！試問咁嘅情況下，真係冇得話佢。

　　講開騎師成績，最叻梗係韋達，以18W高踞榜首，事實上，呢位11屆冠軍今季係有「進步」，正如之前已講過佢啲贏馬賠率，已經比早三幾季冇咁熱，且仍然保持到50%大熱門上名率，算係造福到普羅馬迷！

　　如果講到大熱門保衛者，白德民及杜利萊更勝前者，雖然話二人大熱門坐騎不及韋達咁多，相對地指標性未必咁強，但為數唔係特別少，白德民大熱上名率逾6成，杜利萊仲犀利，上名率達86%。另一方面，數到經常熱倒嘅騎師，小將吳嘉晉係其中1位，佢今季成日喺閘前惹飛，但原來9匹大熱坐騎只得兩P！

馬會賽馬節目主持　洪禮賢