布魯日崩潰難見光明

猪拉多纳

03/11/2011
文： 蘇斯黑柴

經過同比利時網友Lokorus討論後，黑柴確信兩支比甲勁旅布魯日同安德列治目前情況各走極端，前者正處於近年最黑暗時期，後者就被譽為近年比甲最強球隊，今晚策略當然係反布魯日同捧安德列治。




先講H組英冠伯明翰主場對布魯日，布魯日近期三線作戰全面潰敗，上月底歐霸盃主場對伯明翰喺完場前被絕殺，跟住聯賽輸畀弱旅哥治，比足盃互射十二碼遭真特淘汰，上周末聯賽主場對亨克，更喺四比二領先優勢下，末段連失三球反輸四比五，導致功勳教頭哥斯達被炒，現時球隊由兩名助教領軍，但陣中傷兵滿營，兩名後防支柱隊長賀夫根斯同挪威外援賀治利雙雙缺陣，相信好難立即轉弱為強。




伯明翰上周末聯賽主場賽和白禮頓，結束各項賽事六連勝強勢，但主場已經連續三仗冇失波，而且佢哋對歐霸盃極為重視，今晚有力再贏布魯日，小讓平半捧上盤。


安德列治強勢值追


至於L組安德列治主場對奧地利格拉茨就強弱懸殊，安德列治兩周前作客已經贏過格拉茨兩球，佢哋近期除刻意用副選放棄比足盃外，其餘各項賽事連戰連勝，近兩仗主場合共轟入九球不失一球，包括五球大炒國內死敵標準列治，被高度評價為近年最強比甲球隊，今晚主場出擊想勒都勒唔住，捧「讓球主勝」。（兩場比賽均於周五凌晨4時05分開賽）