哥本哈根地頭發「威」

猪拉多纳

03/11/2011
文： 郭球奇

嚟自丹麥嘅哥本哈根，近年歐洲賽主場威力超勁，今晚歐霸盃B組喺自己地頭對住漢諾威，讓平半上盤絕對值得一試！（有線64及204周五凌晨2:00直播）


漢諾威作客麻麻


哥本哈根暫時喺B組以4分排第3，落後漢諾威同標準列治各1分，不過小弟睇好佢哋今晚主場出擊可以全取3分。事關呢隊上屆歷史性成為首支殺入歐聯16強嘅丹麥球隊，近年歐洲賽分組賽主場戰績強勁，近8場取得5勝3和，當中包括喺上屆歐聯逼和「地上最強」巴塞隆拿，絕對唔講得笑。




漢諾威上輪主場對哥本哈根，結果喺兩度領先下被逼和2:2，今輪作客當然被睇低。事實上，呢支德甲球隊今季作客戰績只係一般，喺歐霸盃同德甲，只得2勝2和3負，預計今場喺中場侯加啱啱做鼠蹊手術肯定缺陣下，破到蛋已經叫有交代。