火熱動感愈長愈好

猪拉多纳

　　第九場三班1800米草地。「火熱動感」季內已跑3場，如繼續跑中距離，只會重覆又重覆出現追唔切嘅鏡頭，所以，之後兩期有佢跑過嘅谷草一哩或田草1600米，賀賢都唔等，終於肯加程，意味此馬真係累積夠跑頭。

　　上季尾此駒在同程入Q，輸畀當時打叠兩W嘅「喜蓮智星」，但已跑贏好多今次又同場嘅一批對手，經已證明能力。而季內跑3場，除了首仗因配件拖累，近兩仗末段重現應有追勢，不過，亦一再有唔夠時間追趕感覺，所以，跑長200米點都冇壞，唯一擔心係今場早段可能出現正常偏慢步速，令佢直路比較難追，否則，形勢一定對佢有利。

　　第十場一班1650米泥地。由第1仗已開始揀「多采多姿」，跑落見識到今季走規及情緒改善後嘅進步，其實，上場唔係韋達喺直路略為論盡，「甜橙」可能只得季軍，不過，從近兩仗1400米所見，此馬性能漸漸改變，再跑長啲未必唔係好事。

　　雖然，泥地未跑過，但本身夠噸位、跑法唔落後，先天條件合適，加上，之前一再試泥閘冇抗拒舉止，直路仲追得吓，推算場地性能唔會太水皮，尤其有好位，更易於爭取有利位置，可能試出彩虹。

馬會賽馬節目主持　洪禮賢